عالم سنجل
بقلم - عبدالرحمن مؤمن عبدالحليم
أهلا بيكم أعزائى القراء وخاصة كل واحد سنجل وكل سنجلالية موجودة
موضوع اليوم هيكون عن عالم سمسم قصدى عالم سنجل
ياترى أيه الاسباب اللى بتخلى الواحد مش طايق يعيش قصة حب؟ يمكن بيكون من جرح قديم أو جديد ودا طبعا بيحصل فى مجتمعنا الان كتير- يعنى ممكن يكون بسبب مقلب عاطفى أما من حبيبك أو من جنازة قصدى جوازة فاشلة أو حد وقع بيبنك وبين اللى بتحبه وحد منكم صدق فأنتهت العلاقة
وأحيانا تلاقى ناس سناجل من يوم ما أتولدت ويقولك من اللى بنسمعه ليل ونهار وبشوفه ( خلينى كدا أحسن سنجل سنجل زى بعضه)
يعنى مثلا لو دخلت على صفحة واحد أو واحدة بالقدر لحد يهمك تلاقيه الصبح كاتب الحالة( مرتبط أو مرتبطة)
تدخل بالليل عشان تقوله ربنا يسعدك وتباركله تلاقيه كاتب ( حالة معقدة) ومنزل بوستات ( حب إيه اللى أنت جى تقول عليه ) أو(سنجل وأفتخر ) - سنجل للابد أو سنجل على ما تفرج
رغم أنه كان مسمى نفسه فارس الرومانسية وكان بيقول أن قلبه كله حب وحنية ليه فجأة كتبتها حالة معقدة وشرف معانا فى موسوعة سنجل العالمية بعالمنا الملى بالسناجل عموما مش مشكلة نورت معانا يا أخ ونورتى يا أخت بس ناوين بجد تنورنا كتير ولا هتنورنا للابد ولا من أول غمزة عين من بنت للولد فى الشارع تلاقيه يكتب حبيبى دائما
وفى بنات تكتبلك أنا سنجل وتلاقيها ولا سنجل ولا حاجة ممكن واحد يقولها أنا سنجل تقوله وأنا كمان يا سنجل حياتى طب تجى إزاى فهمينا حضرتك سنجل حياتك دى
وفى ناس تقولك هو راحة للدماغ لان كل ما تحب أكتر فرصتك فى تعب القلب وفقع المرارة وحرقة الدم تكتر وتكتر وأسال مجرب
يعنى مثلا فى بنات كتير بتكتب أنها سنجل وبيكون عندها حق صراحة خصوصا بعد ما الشباب أضربوا بالرصاص فى قلبهم وأتعموا فى عينهم فى الثورة وسببلهم خمول عاطفى خصوصا أن فى شباب كتيرفاهمة الحب غلط خالص - الحب وخاصة اللى قبل الزواج عمره ماكان معناه الشهوة ولا لازم خالص عشان تثبت البنت حبها تروح أماكن مغلقة مع الشاب اللى بتحبه ياما كدا ياما تكون فى نظره مبتحبهوش
طبعا فيه بنات بتكون شطورة وذكية وبتفهم أن دى حوارات وأن دا مش وش جواز وفيه الل بتضعف بسبب الاسلوب الشيطانى لابليس أفندى اللى بيصورها فى نظرات الواد اللى بتحبه أن اللى أدامها مهند
المهم يا جماعة مش عيب خالص أنك تكون سنجل بس أوعى بسبب موقف او تجربة فاشلة تخليك سنجل علطول
الوحدة وحشة برضه قوووى متخليش العمر يجرى بيك عشان أدام هتندم وفى نفس الوقت أوعى تتسرع فى جواز أو تبقى شغال كل شوية قصة حب وكأن قلبك مساكن شعبية
أهدى شوية يا حاج الله يكرمك عشان قلبك كدا هيفرقع من الغيظ منك وبنصح كل الشباب من خلال تجربة شخصية فى الزواج بأن محدش منهم يتسرع ويدى قلبه لحد قبل ما يعرفه كويس ولازم دائما نحكم العقل والقلب سوا لكن العقل الاول ومش عيب نسمع نصيحة اللى أكبر مننا ومش بقولك أمشى بدماغ حد بس أسمع كويس من كذا حد من اللى سبقوك نفس التجربة والنصيحة الاهم اللى بأكد عليها قوى موضوع زواج الشباب وهو صغير السن للى ظروفهم تسمح ليهم بكدا
هتقلى دا إنقاذ ليه من الفتنة ولما يتجوز هيعقل وكلام من دا لكن صراحة الشباب فى السن دا بيكون مفيش خبرة فى إدارة بيت ناجح وتلاقى عيال بيخلفوا عيال
طبعا دا مش للتعميم خالص ولكن إنتشار حالات الطلاق اليومية خاصة من جيل الشباب الصغير دليل على صحة كلامنا
الجواز مش لعبة لان ممكن تخلفوا أولاد ويحصل طلاق بسبب عدم الخبرة وتكونوا كدا شردتوا العيال معاكم وعقدوتهم فى عشتهم
تلاقى الواد المفعوس اللى أنفصل أمه عن أبوه يقولك أنا سنجل وأبويا سنجل وأمى سنجل ويعملها أغنية من كلماته وألحانه وصوته اللى ممكن الواحد بسببه يعيش تلوث سمعى أخر صيحة
بتمنى تكون الرسالة وصلت لكل اللى حابيين يعيشوا معانا ويشرفونا موقتا فى عالم سنجل وبأمر الله أكيد أحنا كمان مش هنعيش سنجل علطول ولا هنتعقد مهما حصل لان صوابعنا مش زى بعضها والحياةمش بتقف على حد لكن خليك وسطى مش تقول أنك قررت نهائيا ورسميا التخلى عن المشاعر العاطفية ولا فى الوقت نفسه تتجوز فى أوائل العشرينات لمجرد أنك حبيت أو لمجرد أنك عاوزة تتجوزى وتقولى المثل الخايب ( ظل راجل ولا ظل حيطة)
أشكركم وبأمر الله ربنا يكرمكم جميعا وتلاقوا ولاد وبنات الحلال وكل واحد تتفك سنجلته بعدما يظبط حاله ويصبح أسعد واحد فى الدنيا بأمر الله
0 التعليقات